Ўзбекистонда 4 ойда беш юзга яқин киши ЙТҲ қурбони бўлди

Сенатнинг Мудофаа ва хавфсизлик масалалари қўмитасида 26 май куни Президентнинг «Автомобиль йўлларида инсон хавфсизлигини ишончли таъминлаш ва ўлим ҳолатларини кескин камайтириш чора-тадбирлари тўғрисида»ги қарори ижроси юзасидан амалга оширилаётган ишлар ҳолати тўғрисида масъул вазирлик ва идоралар раҳбарларининг ахбороти эшитилди. Бу ҳақда Сенат ахборот хизмати хабар берди.

Тадбирда автомобиль йўлларида транспорт воситаларини ўтказувчанлик қобилиятини яхшилаш мақсадида Қорақалпоғистон Республикаси, вилоятлар ва Тошкент шаҳрига 2023 йилда жами 707 та транспорт ва 298 та пиёдалар светофорини ўрнатиш ҳамда 404 та светофорни (348 та транспорт, 56 та пиёда) реконструкция қилиш белгилангани таъкидланди. Шунингдек, Ўзбекистон Республикасининг Жиноят, Жиноят-процессуал ҳамда Маъмурий жавобгарлик тўғрисидаги кодексларини такомиллаштиришга қаратилган қонун лойиҳаси ишлаб чиқилиб, парламент муҳокамасига киритилган бўлишига қарамасдан қарор ижросини таъминлашда айрим камчиликлар ҳам мавжудлиги айтилди.

 

Хусусан, қарорда белгиланган вазифалар ижроси тегишли ҳудудий махсус комиссиялар томонидан тўлиқ таъминланмаслиги ҳамда ҳаракат хавфсизлигини таъминлаш билан боғлиқ масалалар халқ депутатлари маҳаллий Кенгашлари муҳокамасига мунтазам тарзда киритилмаслиги оқибатида 2022 йилда республикада 9902 та йўл транспорт ҳодисаси содир бўлган ҳамда уларда 9606 нафар фуқаро жароҳатланган ва 2356 нафар фуқаро ҳалок бўлган.

 

Бундан ташқари, република бўйлаб 2023 йилнинг дастлабки 4 ойи давомида 2144 та йўл транспорт ҳодисасида 499 нафар фуқаро ҳаётдан кўз юмган.