Белгиланмаган жойга чиқинди ташлаганлик учун БҲМнинг 300 бараваригача жарима қўлланилиши мумкин
Шунингдек, ҳайвонларга нисбатан шафқатсиз муносабатда бўлганлик учун ҳам жарима миқдори оширилади.
Президентнинг «Экология ва атроф-муҳитни муҳофаза қилиш соҳасини трансформация қилиш ва ваколатли давлат органи фаолиятини ташкил этиш чора-тадбирлари тўғрисида»ги фармони билан бир қатор норматив-ҳуқуқий ҳужжатлар тайёрланади. Бу ҳақда Telegramʼдаги «Nigoh» канали хабар берди.
Хусусан, экология ва атроф-муҳитга зарар етказиш, ўсимлик ва ҳайвонот дунёси объектларини нобуд қилиш ёки уларга шикаст етказиш билан боғлиқ жиноятларни оғир жиноятлар тоифасига киритилади
Давлат ўрмон фондига кирмайдиган дарахтлар ва буталар, қимматбаҳо навларнинг кесилишига қўйилган мораторий талабларини бузганлик учун маъмурий жарималар миқдорини 5 бараварга оширилади. Бунда, қўшимча равишда ноқонуний кесилган дарахт ўрнига компенсациявий дарахт кўчатларини айнан дарахт кесилган жойга экиш мажбуриятини белгилаш ҳамда юридик шахсларга нисбатан БҲМнинг 100 бараваридан 300 бараваригача бўлган миқдорда молиявий жарималар қўллаш жорий этилади.
Шунингдек, «Ўзбекистон Қизил» китобига киритилган ҳайвонларнинг ноқонуний овланиши оқибатида ҳайвонот дунёсига етказилган зарар учун ундириш суммаларини 10 бараварга ҳамда ўсимликларни ўсишдан тўхташ даражасигача шикастлантириш ёки йўқ қилиш билан уларга етказилган зарар учун ундириладиган сумма миқдори 5 бараварга оширилади.
Шу билан бирга, саноат, маиший ва бошқа чиқиндиларни тўплаш, ташиш, жойлаштириш, зарарсизлантириш, сақлаш, утилизация қилиш, қайта ишлаш ва реализасия қилиш чоғида табиатни муҳофаза қилиш талабларини бузиш, шунингдек, қаттиқ маиший чиқиндиларни ва қурилиш чиқиндиларини белгиланмаган жойларга ташлаш ҳамда суюқ маиший чиқиндиларни тўкканлик учун маъмурий жарималар миқдорини 10 бараварга оширган ҳолда қўллаш режалаштирилмоқда.
Унга кўра, қўшимча равишда юридик шахсларга нисбатан БҲМнинг 100 бараваридан 300 бараваригача бўлган миқдорда молиявий жарималар қўллашни жорий этиш ҳамда ҳайвонларга нисбатан шафқациз муносабатда бўлганлик учун маъмурий жарималар миқдорини 10 бараварга ошириш ва ушбу ҳуқуқбузарликни содир этган шахсларни ҳайвонларни боқиш ҳуқуқидан маҳрум этишга мўлжалланган норматив-ҳуқуқий ҳужжатлар тайёрланади.
