Табиат ресурслари вазирлиги номи ўзгарди
Бу ҳақда Президентнинг тегишли фармони имзоланди.
Табиат ресурслари вазирлиги «Экология, атроф-муҳитни муҳофаза қилиш ва иқлим ўзгариши вазирлиги» дея қайта номланди. Бу ҳақда вазирлик матбуот котиби хабар берди.
Президентнинг «Экология ва атроф-муҳитни муҳофаза қилиш соҳасини трансформация қилиш ва ваколатли давлат органи фаолиятини ташкил этиш чора-тадбирлари тўғрисида»ги фармонига кўра, Табиат ресурслари вазирлиги «Экология, атроф-муҳитни муҳофаза қилиш ва иқлим ўзгариши вазирлиги» дея қайта номланди.
Қайд этилишича, бундан мақсад Президентнинг «Республика ижро этувчи ҳокимият органлари фаолиятини самарали йўлга қўйишга доир биринчи навбатдаги ташкилий чора-тадбирлар тўғрисида»ги фармони ижросини таъминлаш, рақамли технологиялар асосида замонавий экологик мониторинг механизмини яратиш, экологик маданиятни янада ошириш, биохилмахилликни асраш ва чиқиндилар билан боғлиқ ишларни тартибга солиш, шунингдек, дарахт, буталарни экиш ва яшил ҳудудларни ташкил қилиш ҳамда уларни муҳофаза қилишнинг янги тартибларини жорий қилиш орқали экологик вазиятни тубдан яхшилашдир.
