Тошкентда 16 ёшли бола ЙТҲ содир этди
У «права»сиз машина ҳайдаб, Lada билан тўқнашган.
Бугун, 2 июнь куни Тошкент шаҳрининг Янгиҳаёт туманида иккита автомашина иштирокида йўл-транспорт ҳодисаси содир бўлди. Бу ҳақда шаҳар ИИББ ЙҲХБ маълумот берди.
Ҳодиса соат 5:00 ларда Янгиҳаёт тумани Тошкент металлургия заводи қаршисида юз берган. 2007 йилда туғилган Б.Ш. бошқарувида бўлган Matiz русумли автомашинасини бошқариб кетаётиб, ҳаракатсиз турган Lada билан тўқнашиб кетган.
“Matiz автомашинасининг бошқарувида бўлган ҳайдовчи 16 ёшдаги вояга етмаган фуқаро эканлиги ҳамда автомашина бошқариш ҳуқуқига эга бўлмаганлигини маълум қиламиз”, — дейилади хабарда.
ЙТҲ оқибатида Matiz ҳамда Lada ҳайдовчилари турли тан жароҳатлар билан шифохонага ётқизилган.
Ҳозирда ҳолат юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.
