Сергелида уйларни сув босди
Ҳудуддан оқиб ўтувчи каналда сув меъёрдан ошиб кетган.
Бугун, 4 июнь куни Тошкент шаҳрининг Сергели туманида сув тошқини кузатилди. Ҳолат юзасидан Фавқулодда вазиятлар вазирлиги маълумот берди.
Қайд этилишича, Сергели тумани «Жунариқ» МФЙ Жунариқ кўчаси ҳудудидан оқиб ўтувчи «Салар» каналида сув оқимининг меъёридан ошиқ оқиши сабабли сувнинг ўзандан тошиш ҳодисаси кузатилган. Дастлабки маълумотларга кўра, «Жунариқ» кўчасида жойлашган 7 та уй ертўласи, ҳовлиси ва 3 та ишлаб чиқариш цехи ҳудудига сув тўпланган.
Зудлик билан воқеа жойига ФВВ раҳбарияти ва Тошкент шаҳар ФВБ раҳбари бошчилигида қутқарувчилар етиб борган. Аҳоли хонадонларига сув тошиш ҳолати тўлиқ тўхтаган. Махсус техникалар ва сув тортиш мосламаси (мотопомпа)лар ёрдамида қолдиқ сувларни тортиш ишлари амалга оширилмоқда.
Ҳодиса оқибатида тан жароҳати олган ва ҳалок бўлганлар йўқ, уйларнинг деворларига зарар етмаган.
