Британия Мудофаа вазирининг номзоди НАТО бош котиблигига қўйилади
Риши Сунак Байденни уни қўллаб-қувватлашга кўндирмоқчи.
Буюк Британия бош вазири Риши Сунак шу ҳафта Вашингтонга сафари чоғида АҚШ президенти Жо Байденни Британия Мудофаа вазири Бен Уоллеснинг НАТО бош котиби лавозимига номзодини қўллаб-қувватлашга кўндирмоқчи.
Сунак АҚШга икки кунлик ташрифи чоғида Оқ уйда Америка етакчиси билан учрашади. Хабар қилинишича, Уоллес Украинани қўллаб-қувватлаш халқаро коалициясини яратишдаги марказий роли туфайли АҚШда машҳур. У шунингдек, Буюк Британиянинг мудофаа харажатларини ЯИМнинг 2,25 фоизига кўтарди ва йил охирига келиб уни 3 фоизга етказишга ҳаракат қилмоқда.
Альянс бош котиби лавозимига Эстония бош вазири Кая Каллас, Нидерландия бош вазири Марк Рютте, Испания бош вазири Педро Санчес ва Еврокомиссия раҳбари Урсула фон дер Леен давогарлик қилишлари мумкин.
Эслатиб ўтамиз, НАТОнинг амалдаги раҳбари Енс Столтенбергнинг ваколати 2023 йил октябрь ойида тугайди ва у мандатни янада узайтириш ниятида эмас.
