АҚШ ва Хитой расмийлари Пекинда «очиқ» музокаралар ўтказди
Bloomberg: Критенбринк Хитойнинг жосуслик шари АҚШ тупроғи устидан учиб ўтганидан кейин Пекинга ташриф буюрган илк амалдор бўлди.
АҚШ Давлат департаментининг Осиё бўйича вакили Даниел Критенбринк ва Хитой ташқи ишлар вазири ўринбосари Ма Чжаоху икки давлат мудофаа раҳбарлари Ллойд Остин ва Ли Шанфу Сингапурдаги хавфсизлик форумида тўқнаш келганидан бир неча кун ўтиб учрашдилар. Томонлар «очиқ-ойдин музокаралар олиб боришди, деб ёзди Bloomberg.
Шундай қилиб, Критенбринк февраль ойида Хитойнинг жосуслик шари АҚШ тупроғи устидан учиб ўтиб, давлатлар ўртасидаги муносабатлар кескин ёмонлашганидан кейин Пекинга илк ташриф буюрган АҚШнинг энг мартабали амалдорига айланди. Расмийлар алоқани давом эттиришга рози бўлишди, аммо Пекин Вашингтоннинг «провокацион» ҳаракатларидан эҳтиёт бўлиб қолмоқда, дея хабар беради Reuters.
«Ҳар икки томон Хитой-АҚШ муносабатларини яхшилашга кўмаклашиш бўйича очиқ, конструктив ва самарали мулоқотга киришди», – дейилади Хитой ташқи ишлар вазирлиги баёнотида. Давлат департаменти ҳам музокараларни очиқ ва самарали деб атади.
Сингапурда Остин ва Ли Шангфу қўл сиқиб кўришишгани айтилмоқда. Пентагон, шунингдек, «ҳарбий соҳада турли даражадаги муҳокамаларга эришишда давом этиш» ниятини билдирган.
