ИИБ формасида сигарет чекиб, беҳаё сўзлар ишлатган қизнинг шахси аниқланди

 

Ижтимоий тармоқларда бир қиз автомобилда ички ишлар ходими кийимида сигарет чекаётгани ва беҳаё сўзларни ишлатаётгани тасвирланган видео тарқалди. Тошкент шаҳар ИИББ ҳолат бўйича муносабат билдирди.

 

Аниқланишича, мазкур видеодаги қиз мактаб ўқувчиси – вояга етмаган 2006 йилда туғилган С.A. бўлиб, унинг ота-онаси билан бирга профилактик суҳбат ўтказилган. Уларга қиз ички ишлар органлари формасини рухсатсиз кийиш билан Маъмурий жавобгарлик тўғрисидаги кодексининг тегишли моддасига кўра, яъни формали кийим-бош кийиб юриши назарда тутилган вазирликлар, идоралар ва ташкилотлар ҳарбий хизматчилари ҳамда ходимларининг тасдиқланган намунадаги ҳарбий, идоравий ва махсус формали кийим-бошини бундай ҳуқуққа эга бўлмаган шахслар томонидан кийиб юриш тақиқлангани ва бу хатти-ҳаракати билан у қонунни бузгани тушунтирилган.

 

Суҳбат давомида қиз ушбу формани таниши 20 ёшли Ш.М.дaн олгани ва ушбу видео унга тегишли бўлган Собалт русумли автомобилда суратга олинганлигини билдирган. Текширув жараёнида Sh.M. ушбу формани қонунга хилоф равишда сақлаганлиги аниқланган.

 

Мазкур ҳолат бўйича қизнинг онаси В.A.гa нисбатан Маъмурий жавобгарлик тўғрисидаги кодексининг 47-моддаси (“Фарзандларни тарбиялаш ва ўқитиш бўйича мажбуриятларни бажармаслик”) билан маъмурий баённома расмийлаштирилган. Шунингдек, Sh.M.dan форма ўрнатилган тартибда олиб қўйилган. Ш.М. Маъмурий жавобгарлик тўғрисидаги кодексининг тегишли моддаси билан жавобгарликка тортилган, суд томонидан унга нисбатан базавий ҳисоблаш миқдорининг икки баробари миқдорида жарима жазоси тайинланган.