Ўзбекистондан келгани айтилаётган чумолилар Буюк Британия энергиясига таҳдид қилмоқда

 

Lasius neglectus ёки инглизлар таъбири билан айтганда «электр чумолилар» оролга 2009 йилда, Ўзбекистондан олиб келинган хона ўсимликлари билан бирга бориб қолган. Бу ҳақда Daily Star нашри ёзмоқда. Ҳашаротлар электр симларини «хуш кўриши» билан машҳур, улар қисқа туташув ва электр узилишларига сабаб бўлмоқда. Мутахассисларнинг фикрича, улар ҳатто уйларни электрсиз қолдириши мумкин.

 

Нашрнинг ёзишича, яқинда олимлар чумолилар уяси маликалари уча олишини аниқлади. Яъни «электр чумолилар» янги ҳудудларни илгари ўйланганидан тезроқ эгаллашга қодир.

 

«Электр чумолилар жуда хавфли бўлиши мумкин. Улар кабеллар ва коммутаторлар атрофида колониялар ҳосил қилади ва осонгина қисқа туташувга олиб келиши мумкин, бу эса ўз навбатида электр узилишига ёки ҳатто ёнғинга олиб келади», — деган пестицидлар билан шуғулланувчи Cleankill Pest Control раҳбари Пол Бейтс.

 

Йорк университети биологлари олиб борган янги тадқиқот шуни кўрсатдики, Буюк Британия иқлими бу инвазив тур учун мос келган. «Электр чумолилар» ҳар йили ўз уясидан 20-50 километр масофани босиб ўтиши ва шу радиусда янги колониялар яратиши мумкин. Шу билан бирга, чумоли инида бир нечта малика бўлиши мумкин.

 

Lasius neglectus чумолилари бир неча йил ичида Буюк Британиянинг турли ҳудудларига тарқалиб кетгани айтилмоқда. Тадқиқотчиларнинг таъкидлашича, босқинчи ҳашаротлар бошқа чумоли турларини сиқиб чиқаряпти.