Дунёда ўрмон ёнғинлари 50 фоизга кўпайиши мумкин
Бу бўйича олимлар ўз хулосаларини эълон қилди.
Иқлим ўзгариши дунёда ўрмон ёнғинлари сони ва уларнинг кўлами ошишига олиб келиши мумкин. Норвегия иқлим ва атроф-муҳит тадқиқотлари институти олимлари шундай хулосага келди.
Олимларнинг таъкидлашича, глобал ҳарорат кўтарилиб борар экан, дунёнинг турли чеккаларида янги аланга ўчоқлари пайдо бўлаверади.
Канадада юз бераётган ўрмон ёнғинларидан чиқаётган тутун ҳатто Норвегияга ҳам етиб борди. Олимлар ҳавода аэрозол зарралари концентрациясининг ошишини қайд этдилар. Тутун Европа устидан атмосферада ҳаракатланишда давом этади. Канададаги ёнғинни ўчиришда ҳарбийлар иштирок этмоқда. Жорий ёзда Европа Иттифоқи ўзининг ёнғинга қарши флотини икки баробарга оширди.
Илгари БМТ аср охирига бориб ёнғинлар 50 фоизга кўпайиши ҳақида огоҳлантирган эди. 2030 йилга бориб эса уларнинг частотаси 14 фоизга ошади. Ўрмон ёнғинлари ва иқлим ўзгариши бир-бири билан чамбарчас боғлиқ. Қурғоқчилик, кучли шамол ва паст намлик ёнғин тарқалишига ёрдам беради. Шу билан бирга, ҳодиса тескари таъсир кўрсатади: ёнғинлар туфайли торф ва тропик ўрмонлар каби юқори углеродли экотизимлар вайрон бўлади.
