Хоразмдаги барча мактаб ва боғчалар тўлиқ фильтрланган ичимлик суви билан таъминланади

 

Тадбиркорлар ва ишбилармонлар ҳаракати – Ўзбекистон Либерал-демократик партиясидан Ўзбекистон президентлигига номзод Шавкат Мирзиёевнинг хоразмлик сайловчилар билан учрашуви бошланди. Учрашувда номзод сайловчиларни ўзининг сайловолди дастури билан таништирмоқда.

 

Жумладан, Шавкат Мирзиёевнинг таъкидлашича, Хоразмдаги барча боғча ва мактаблар фильтрланган ичимлик суви билан тўлиқ таъминланади. Шунингдек, 2030 йилга қадар мактабгача таълимга бўлган эҳтиёж тўлиқ қопланади ва қамров ҳозирги 79 фоиздан 100 фоизга етказилиши режалаштирилган.

Шу мақсадда, қарийб 2 триллион сўм маблағ ҳисобига 500 га яқин янги боғчалар ташкил этилади. Шу билан бирга, келгуси етти йилда вилоятда замонавий мактаблар барпо этиш, мавжудларининг қувватини ошириш ҳисобига қўшимча 90 минг ўқувчи ўрни яратилади. 

 

«Аҳолининг замонавий уй-жойга ўсиб бораётган талабини қондириш мақсадида, 50 минг хонадонга эга 2 мингта кўп қаватли уйлар барпо этилади», — дейди президентликка номзод.

 

Бундан ташқари, 2030 йилга қадар вилоятнинг Урганч, Хива, Питнак шаҳарлари, Гурлан, Тупроққалъа, Ҳазорасп, Боғот, Хонқа ва Янгиариқ туманларидаги 1 миллион аҳоли сув таъминоти яхшиланади. Бунинг учун 100 миллион доллар йўналтирилади.