Янгийўлда эркак итни машинасида судраб қийнади
Ҳолат бўйича ИИБ маълумот берди.
Ижтимоий тармоқда Тошкент вилоятининг Янгийўл туманида фуқаро Nexia автомашинасида итни судраб кетаётгани акс этган видео тарқалди. Ҳолатга вилоят ИИБ ахборот хизмати муносабат билдирди.
Маълум қилинишича, ҳолат ИИБ ходимлари томонидан тезкор ўрганилиб, тегишли ҳужжатлар расмийлаштирилган ва иш судга юборилган.
1983 йилда туғилган фуқаро Н.А. Nexia автомашинасида қўшнисига тегишли бўлган итни фарзандларини тишламоқчи бўлгани учун далага олиб бориб ташламоқчи бўлган. Итни яшаш манзилидан олиб кетаётган вақтида уни арқон билан боғлаб, автотранспортда судраган.
ИИБ ходимлари томонидан фуқаро Н.А. билан профилактик суҳбат ўтказилган ва унга нисбатан МЖтКнинг 111-моддасига (ҳайвонларга нисбатан шафқатсиз муносабатда бўлиш) асосан маъмурий баённома расмийлаштирилиб, қонуний чора кўриш учун ЖИБ Янгийўл тумани судига юборилган.
