Андрей Куликов қуриган Орол денгизи туби бўйлаб 42 км.дан ортиқ масофани босиб ўтди — видео
Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар қилди.
Ўзбекистондаги оммавий югуриш мусобақаси ташкилотчиси Андрей Куликов қуриган Орол денгизи туби бўйлаб 42 км 195 м масофани босиб ўтди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар қилди.
Маълум қилинишича, мазкур марафон 17 июнь – Бутунжаҳон чўлланиш ва қурғоқчиликка қарши кураш куни муносабати билан Экология вазирлиги томонидан ташкил этилди. Югуриш "Aral Eco Marathon” марафони доирасида ўтказилди. Мақсад жаҳон ҳамжамиятининг эътиборини ушбу минтақанинг экологик муаммоларига қаратиш ва барчани сайёрамизни сақлаб қолиш учун фаол қадамлар ташлашга ундашдир.
“Давлатимиз раҳбари Шавкат Мирзиёев ташаббуси билан Орол денгизининг суви қуриган ҳудудида глобал экологик муаммонинг олдини олиш ва аҳолининг ижтимоий-иқтисодий яшаш тарзини яхшилашга қаратилган кенг кўламли чора-тадбирлар амалга оширилмоқда. Хусусан, 2018–2022 йиллар оралиғида 1,6 млн гектар майдонда "яшил қопламалар" ҳимоя ўрмонзорлари барпо қилинди. 2023 йилда эса Қорақалпоғистон Республикасининг Мўйноқ туманида 128 минг гектар майдонда "яшил қопламалар" яратилди. Бундан ташқари, ҳар йили 100 гектардан кам бўлмаган ҳажмда саксовул ниҳолхоналари ташкил этилди", — деди Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов.
Таъкидланишича, “Яшил макон” умуммиллий лойиҳаси доирасида жорий йил баҳор мавсумида ўрмон хўжаликлари томонидан 21,8 млн дона иқлим шароитга мос манзарали, мевали дарахт ва буталарнинг кўчат ва қаламчалари етказиб берилди. Янгидан 500 гектар ҳудудда тупроқ-иқлим шароитга мос дарахт ва буталар турларидан ниҳолхона ва кўчатхоналар ташкил этилди.
Қолаверса, жорий йилда Нукус шаҳри атрофида 5 км масофада 3590 та, Урганч шаҳри ва Урганч-Гурлан автомобиль йўли атрофига 5 км масофада 2500 та каталпа, қайрағоч, япон сафораси каби тупроқ-иқлим шароитга мос дарахтлар кўчатлари экилиб, “яшил белбоғлар” барпо қилинди.
