Илк термоядро бомбаси ихтирочиси ўз жонига қасд қилди
92 ёшли Клинишовнинг жасади 17 июнь куни топилган.
Биринчи совет термоядро бомбаси ихтирочиси, 92 ёшли Григорий Клинишов Москва шаҳрида ўз жонига қасд қилди. «Регнум» хабарига кўра, муҳандис-физикнинг жасади 17 июнь куни ўз уйида қариндошлари томонидан топилган.
Клинишов қариндошларининг уйдан чиқиб кетишини кутиб, видолашув хатини қолдириб, ўз жонига қасд этгани тахмин қилинмоқда. Хатда у қизидан кечирим сўраган. Сўнгги вақтларда унинг касал экани, хотинининг ўлимидан қаттиқ қайғуда бўлгани айтилмоқда.
Григорий Емелянович Клинишов 1930 йилда туғилган. У биринчи совет термоядро бомбасини (РДС-37) ихтирочиларидан ҳисобланади.
Ядро қуроли билан бир хил зарар етказувчи омилларга эга термоядро қуролининг портловчи кучи анча қудратли бўлади.
Биринчи совет термоядро бомбаси синови 1955 йил 22 ноябрда Қозоғистондаги Семипалатинск полигонида бўлиб ўтди. Шу куни дунёда биринчи марта қуввати 1 мегатоннадан ортиқ бўлган бомба портлатилди. Ушбу синов 200 км радиусда бир қатор фожиали воқеаларга олиб келди. 59 та аҳоли пунктида бинолар зарарланди ёки вайрон бўлди, ўнлаб одамлар жароҳатланди, шифтларнинг қулаши туфайли бир неча киши ҳалок бўлди. Портлаш эпицентридан 240 км узоқликдаги радиусда уйларнинг ойналари синди ва радиация даражасининг ошиши қайд этилди.
