Кам таъминланган шахсларга бепул юридик ёрдам кўрсатилади
Кам таъминланган, хотин-қизлар ва эркакларнинг тенг ҳуқуқлилиги бузилган шахсларга давлат ҳисобидан юридик ёрдам кўрсатилинади.
АОКАда ўтказилган матбуот анжуманида Адлия вазирлиги раҳбарияти ва мутасаддилари «Давлат ҳисобидан юридик ёрдам кўрсатиш тўғрисида»ги қонуннинг мазмун-моҳияти ва аҳамияти юзасидан маълумот берди.
Унга кўра, ушбу қонун билан давлат ҳисобидан юридик ёрдам кўрсатиладиган ишлар рўйхатига фуқаролик, маъмурий ва маъмурий ҳуқуқбузарлик тўғрисидаги ишларни киритиш орқали фуқароларнинг бепул юридик ёрдам олиш имкониятлари кенгайтирилмоқда.
Маълум қилинишича, давлат ҳисобидан юридик ёрдам кам таъминланган шахсларга, хотин-қизлар ва эркакларнинг тенг ҳуқуқлилиги бузилган шахсларга ҳамда психиатрия ёрдами кўрсатилаётган шахсларга кўрсатилиши белгиланмоқда.
Шунингдек, қонун билан давлат ҳисобидан юридик ёрдам кўрсатадиган адвокатларни электрон танлаш имконияти яратилмоқда. Мазкур адвокатларни ишга жалб этиш инсон омилисиз «Юридик ёрдам» ахборот тизими орқали тасодифий танланади.
Давлат ҳисобидан юридик ёрдам кўрсатган адвокатлар ҳақидаги маълумотлар очиқ ва шаффоф ҳолда «Юридик ёрдам» ахборот тизимида эълон қилинади.
