Самарқанддаги чўмилиш ҳавзаси очилишида рақсга тушган қизлар иши бўйича қўшимча маълумот берилди
Самарқанд вилояти ИИБ ходимларига нисбатан хизмат текшируви тайинланди.
Аввалроқ Самарқандда очилиш маросимида аёллар беҳаё рақсга тушган чўмилиш ҳавзаси масъулларига тегишли тартибда ҳужжатлар расмийлаштирилиб, судга юборилгани ҳақида хабар берилганди.
ИИВ матбуот котибининг маълум қилишича, мазкур ҳолат ИИВ томонидан ўрганилганда маълум бўлишича, ушбу келишилмаган жамоат тадбири турли тартиб бузилишларга олиб келиши мумкинлигини инобатга олган ҳолда, мазкур ҳолат Самарқанд вилояти ИИБ томонидан ўрганилиб, тадбир ташкилотчилари билан профилактик суҳбат ўтказилиб, келгусида хавфсизлик чоралари кўрилиши зарурияти ҳақида қатъий огоҳлантирилган.
Шунингдек, хабарда акс этган, тадбирда иштирок этган аёлларга нисбатан тери-таносил касалликлари кўригидан ўтказилганлиги ва ОИТС/ОИВга текшириш учун қон таҳлиллари олинганлиги тўғрисидаги маълумот, вилоят ИИБ матбуот котиби Ж. Сагдуллаев томонидан шошмашошарлик билан вазиятни тўлиқ ўрганмаган ҳолда тайёрланганлиги аниқланган.
Таъкидланишича, тадбир иштирокчиларининг, шу жумладан аёлларнинг ҳеч бири тиббий кўрикдан ўтказилмаган ва уларга нисбатан ҳуқуқий таъсир чоралари қўлланилмаган.
Ҳозирда Ички ишлар вазирлиги томонидан вилоят ИИБ ходимларининг ҳаракатлари юзасидан хизмат текшируви тайинланган.
