Ўзбекистоннинг тинчликсевар давлатлар рейтингидаги ўрни эълон қилинди
Рейтингдан 163 мамлакат ўрин олган
Глобал таҳлил маркази ҳисобланувчи Иқтисодиёт ва тинчлик институти 2022 йилги энг тинчликсевар давлатлар рейтингини эълон қилди. Бу ҳақда институт веб-сайтида хабар берилди.
«Тинчликнинг глобал кўрсаткичи» ҳисоботига кўра, Ўзбекистон рейтингга киритилган 163 мамлакат ичида 87-ўринни эгаллаган ва ўртача тинчлик кўрсаткичига эга мамлакатлар гуруҳидан жой олган.
Энг тажовузкор давлатлар сифатида Сурия, Яман, Жанубий Судан ва Россия қайд этилган. Кучли ўнталикка эса Янги Зеландия, Ирландия, Дания, Австрия, Португалия, Словения, Чехия, Сингапур ва Япония киритилган.
Маълумот ўрнида, жаҳон рейтингини тузишда ижтимоий бирдамлик даражаси, инсон ҳуқуқларига риоя қилиш, сиёсий ва иқтисодий барқарорлик, қамоқхоналардаги маҳбуслар сони, терроризм таҳдиди даражаси, мудофаа харажатлари ҳамда ҳарбий ҳаракатлар каби омиллар ҳисобга олинган.
