Грузинлар Қора денгиздан хавотирда
Батуми аҳолиси мутахассислардан сув сифатини текширишни талаб қилди.
Украинадаги Каховка ГЕСидаги вайронагарчиликдан хавотир Грузияга ҳам етиб келди. Июн ойи ўрталарида сузиш мавсуми очилган мамлакатнинг курорт шаҳри Батумида одамлар сувнинг ифлосланганидан ташвишда. Маҳаллий аҳоли атроф-муҳитни муҳофаза қилиш миллий агентлигидан қўшимча мониторинг чораларини кўришни сўради.
Илгари денгиз суви сифати мониторинги ҳар ойда бир марта амалга оширилар эди. Лаборатория тадқиқотлари жараёнида физик ва кимёвий кўрсаткичлар, шу жумладан сувнинг шўрлиги аниқланади.
Июнь ойида Ажариянинг бир қанча курорт ҳудудларида олиб борилган бактериологик тадқиқотлар шуни кўрсатдики, бу йил денгиз суви ўтган мавсумдан ҳам яхшироқ.
