Ўзбекистонда ҳарорат 45 даражагача исийди

 

«Ўзгидромет» маълумотларига кўра, ушбу ҳафтанинг катта қисмида Ўзбекистон ҳудуди бўйича об-ҳаво Эрон ҳудудларидан иссиқ ҳаво кириб келиши билан белгиланади.

 

Қайд этилишича, ҳаво ҳарорати кундан-кунга кўтарилади. Республика ҳудудларининг катта қисмида иссиқ об-ҳавонинг чўққиси ҳафтанинг ўрталарига тўғри келади. Хусусан, 12-13 июль кунлари кундузги ҳаво ҳарорати 40-42 даражагача, жанубда ва чўл ҳудудларда 43-45 даражагача кўтарилади.

 

Шунингдек, Қорақалпоғистон ва Хоразм вилоятининг шимолида 11-12 июль кунлари энг юқори ҳарорат  43-45 даража бўлиши кутилмоқда.

 

«Кучли иссиқ қисқа муддат кузатилади. 13 июлда Ўзбекистоннинг шимоли-ғарбий ҳудудларида, 14 июлда республиканинг барча ҳудудларида атмосферадаги жанубий оқимлар ғарбий оқимларга ўзгаради ва ҳаво ҳарорати 33-38 даражагача, жанубда 40 даражагача пасаяди. Бундай ҳарорат фони дам олиш кунларида ҳам сақланиб туради», — дейилади хабарда.

 

Ушбу ҳафта давомида республиканинг барча ҳудудлари бўйича ҳаво кам булутли ва асосан қуруқ бўлиши кутилмоқда.