Ўзбекистон автомобиль бозорида июнь ойида пасайиш кузатилди
Ушбу ойда янги маҳаллий енгил автомобиллар савдоси 20 фоизга камайган бўлса, хорижда ишлаб чиқарилган янги енгил автомобиллар савдоси 14 фоизга ўсди.
Иқтисодий тадқиқотлар ва ислоҳотлар маркази маълумотларига кўра, 2023 йил бошидан бери май ойи Ўзбекистон автомобиль бозоридаги энг муваффақиятли ой бўлди, бироқ июнь ойида пасайиш кузатилди.
Қайд этилишича, июнь ойида сотилган автомобиллар сони 123 мингтани ташкил этди. Ушбу кўрсаткич май ойи билан солиштирилганда 21 фоизга пасайганини, 2022 йилнинг июнь ойига нисбатан 2,6 фоизга ўсганини кўриш мумкин.
Ёзнинг биринчи ойида Ўзбекистонда 110,5 минг дона енгил автомобиль сотилган бўлиб, кўрсаткич бир ой давомида 21,6 фоизга камайган.
Шунингдек, июнь ойи давомида бирламчи бозорда енгил автомобиллар савдоси 17,5 фоизга камайди. Ушбу ойда янги маҳаллий енгил автомобиллар савдоси деярли 24 мингни ташкил этди ва май ойига нисбатан 20 фоизга камайди.
Хорижда ишлаб чиқарилган янги енгил автомобиллар савдоси эса июнь ойида 3,7 мингтани ташкил этиб, 14 фоизга ўсди.
Бундан ташқари, 2023 йилнинг биринчи ярмида электромобиллар савдоси 7,6 мингтани ташкил этиб, йиллик ўсиши 1,7 баравар кўпайгани кўриш мумкин.
