Саудия Арабистони ва Туркия уруш пайти Россияга олиб кетилган украиналик болаларни қайтариш устида ишламоқда
Аввалроқ Халқаро жиноий суд Владимир Путинга нисбатан украин болаларининг Россияга депортациясини ташкил этиш бўйича иш очганди.
Саудия Арабистони ва Туркия уруш пайтида Россияга олиб кетилган украиналик болаларни қайтариш бўйича келишувни муҳокама қилмоқда. Музокараларда Роман Абрамович иштирок этмоқда. Бу ҳақда Британиянинг The Financial Times газетаси музокаралардан хабардор манбалар сўзларига таяниб хабар берди.
Қайд этилишича, музокаралар давомида уруш пайтида Россияга олиб кетилган минглаб болаларнинг рўйхати тузилмоқда, дейди манбалар,
Аввал хабар қилинмаган музокаралар бир неча ойдан бери давом этмоқда. Муҳокамаларда «Челси» футбол клубининг собиқ хўжайини Роман Абрамович ҳам иштирок этмоқда. Илгари у Россия Федерацияси Президентининг вакили сифатида Украина билан музокараларда, шу жумладан асирларни алмашиш ва “дон битими”ни тузишда ҳам иштирок этган.
Маълумот учун, март ойида Халқаро жиноий суд Россия президенти Владимир Путин ва унинг болалар ҳуқуқлари бўйича комиссари Мария Лвова-Беловани Украинанинг босиб олинган ҳудудларидан болаларни Россияга ноқонуний депортация қилишда айблаган эди.
