Шавкат Мирзиёев Олмазорга борди
Президент Хастимом маҳалласида бўлиб, хонадонлардаги шароитлар билан танишди ҳамда аҳоли билан суҳбатлашди.
Шавкат Мирзиёев Тошкент шаҳри Олмазор туманидаги Хастимом маҳалласида бўлди. Президент матбуот хизмати хабарига кўра, бу ерда 1 минг 500 нафардан зиёд аҳоли яшайди. Уларнинг кўпчилиги ҳунармандчилик ва савдо билан шуғулланади.
Давлат раҳбари хонадонлардаги шароитларни кириб кўрди, аҳоли вакиллари билан суҳбатлашди. Нуронийларнинг маҳалладаги турмуш тарзи, ёшларнинг касб-кори ҳақида сўз борди. Тинчлик-осойишталик, хонадонларга файзу барака тилаб дуо қилинди.
«Маълумки, мамлакатимизнинг барча ҳудудларида ’Обод маҳаллаʼ, ’Обод қишлоқʼ дастурлари амалга оширилмоқда. Йўллар, муҳандислик тармоқлари таъмирланиб, хонадонларга файз кирмоқда. Бу маҳаллани ҳам ’Обод хонадонʼ дастури асосида яхшилаш кўзда тутилмоқда. Ҳар бир инсонга муносиб шароит яратиш мақсадимиз ва бурчимиз», – деди Президент.
Давлат раҳбари уйларда ташкил этилган ҳунармандлик устахоналари ва маҳалладаги кичик кўргазмани кўздан кечирди. Ўзини ўзи банд қилишни кенгайтириш, туристлар учун савдо ва хизматларни йўлга қўйиш бўйича мутасаддиларга топшириқлар берди.
