Нодавлат ташкилотларнинг хорижий грантларни амалга ошириш тартиби соддалаштирилади

 

Норматив-ҳуқуқий ҳужжатлар лойиҳалари муҳокамаси порталига «Нодавлат нотижорат ташкилотлари томонидан ижтимоий фойдали дастурлар ва лойиҳалар амалга оширилишида ижтимоий шериклик ҳамда халқаро ҳамкорликни янада қўллаб-қувватлаш чора-тадбирлари тўғрисида»ги қонун лойиҳаси жойлаштирилди.

 

Лойиҳа нодавлат ташкилотлари томонидан ташқи манбалардан пул маблағи олиш ҳамда грант лойиҳаларини амалга ошириш тартибини янада такомиллаштириш ва соддалаштиришни назарда тутади.

 

Шунингдек, лойиҳа қуйидаги талабларни бекор қилишни кўзда тутади:

 

• нодавлат ташкилотларининг грант лойиҳасини амалга ошириш юзасидан Ташқи ишлар вазирлигининг хулосасини олиш;
• грант лойиҳасини амалга оширишга бириктирилган миллий ҳамкор томонидан лойиҳага ўзгартириш ва қўшимчалар киритиш ҳамда унинг муддатини белгилаш юзасидан таклифлар ва тавсиялар бериш;
• қиймати БҲМнинг 2 000 бараваригача бўлган грант лойиҳаси
• «йўл харитаси»ни миллий ҳамкор билан биргаликда тасдиқлаш;
• қиймати БҲМнинг 2 000 баравари ва ундан юқори бўлган грант лойиҳаси «йўл харитаси»ни Вазирлар Маҳкамаси билан келишиш;
• грант лойиҳаси «йўл харитаси» ижросига бағишланган йиғилишлар ўтказиш, грант лойиҳасига ўзгартириш ва қўшимчалар киритиш ҳақидаги қарорларни Адлия вазирлиги ва Вазирлар Маҳкамаси билан келишиш;
• грант лойиҳаси «йўл харитаси» ижроси якуни бўйича умумлаштирилган маълумотни Адлия вазирлиги ва Вазирлар Маҳкамасига киритиш;
• Адлия вазирлиги томонидан миллий ҳамкордан «йўл хариталари»нинг ижроси бўйича жорий ва якуний маълумотни сўраб олиш;
• давлат ва нодавлат ташкилотлари ўртасида имзоланадиган меморандумлар лойиҳаларини Адлия вазирлиги ва Ташқи ишлар вазирлигига кўриб чиқиш учун киритиш.