Яқинда халқаро бренд остида янги меҳмонхоналар иш бошлайди
Бирлашган Араб Амирликларининг Rotana бренди Ўзбекистоннинг 4 та шаҳрида меҳмонхоналарни ишга тушириш таклифини берди.
Тез орада Ўзбекистонда Бирлашган Араб Амирликлари бренди остида меҳмонхоналар иш бошлайди. Бу ҳақда Маданият ва туризм вазирлиги хабар берди.
Маданият ва туризм вазири Озодбек Назарбеков Rotana Hotels and Resorts (Rotana меҳмонхоналар бошқаруви) корпорацияси директорлар кенгаши аъзоси Ҳусайн ал Новаис билан учрашди.
Хорижлик меҳмон араб давлатларида Ўзбекистон бўйича тарғибот ишлари олиб борилаётган бўлсада, бу қуёшли юртнинг тўлиқ имкониятларини очиб бера олмаётганлигини таъкидлади. Шу боисдан келажакда бу йўналишда ҳамкорлик қилиш масаласини илгари сурди.
Маданият ва туризм вазири Rotana Hotels and Resorts корпорацияси директорлар кенгаши аъзоси билан учрашди
Икки томонлама ўтказилган мулоқотлар жараёнида шуйилнинг октябрь ойида Самарқандда ўтказиладиган Бутунжаҳон туризм ташкилоти (UNWTO) Бош ассамблиясининг юбилей 25-сессияси доирасида ўтказиладиган тадбирларда корпорациянинг иштироки ва унинг доирасида амалга ошириладиган лойиҳалар муҳокама қилинди.
"Мулоқот якунида Ҳусайн ал Новаис Rotana корпорацияси бренди остида Тошкент, Самарқанд, Бухоро ва Хива шаҳарларида меҳмонхоналар бошқаруви билан шуғулланиш ёки инвестиция киритган ҳолда янги меҳмонхоналарни ишга тушириш таклифини берди", дейилади хабарда.
