Нотариуслар лицензияси амал қилишини тўхтатиб турадиган ҳолатлар рўйхати кенгайди

 

Адлия вазири томонидан «Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳузуридаги малака комиссиялари тўғрисидаги низомга ўзгартириш ва қўшимчалар киритиш ҳақида»ги буйруқ имзоланди.

 

Ўзгаришларга кўра, нотариус лицензиясининг амал қилиши тўхтатиб турилган даврда ушбу нотариус томонидан содир этилган бошқа қоидабузарлик учун малака комиссияси томонидан янги қарор қабул қилинади. Бунда, қоидабузарлик учун лицензиянинг амал қилишини тўхтатиб туриш бўйича қўлланилган янги муддат дастлабки муддат ўтиши бошланган кундан бошлаб ҳисобланади.

 

Шунингдек, содир этилганда лицензиянинг амал қилишини тўхтатиб турадиган қоидабузарликлар рўйхати кенгаймоқда:

 

• нотариал тасдиқланган ҳужжатга унинг аниқ арифметик хатоларини тузатиш белгиланган тартибда амалга оширилмагани – 15 кунга;
• нотариал ҳаракатни амалга ошириш турига риоя этилмагани – 1 ойга;
• нотариал ҳаракатлар асосида вужудга келадиган кўчмас мулкка нисбатан мулк ҳуқуқи ва бошқа ашёвий ҳуқуқлар ҳақидаги маълумотларни Кўчмас мулк объектларига бўлган ҳуқуқларнинг давлат реестрига киритиш учун давлат рўйхатидан ўтказувчи органга юборилмагани, қонунчилик ҳужжатларида юборилиши белгиланмаган ҳоллар бундан мустасно – 15 кун;
• жиноий фаолиятдан олинган даромадларни легаллаштиришга қарши курашиш бўйича ички назорат қоидаларга амал қилинмагани – 1 ойга;
• қонунчилик ҳужжатларида бажарилишига тўғридан тўғри чеклов мавжуд бўлган нотариал ҳаракат амалга оширилгани –  6 ойга;
• нотариус томонидан нотариал идора ходими ёки бошқа шахснинг нотариал ҳаракат учун қонунчилик ҳужжатларида белгиланганидан ташқари моддий манфаат кўришига йўл қўйилгани – 4 ойга;
• иш вақти давомида узрли сабабларсиз иш жойида бўлмагани – 15 кун;
• қонунчилик ҳужжатларида назарда тутилмаган ҳолларда мол-мулкни бошқа шахсга ўтказишга тақиқ қўйилгани – 3 ойга;
• нотариал фаолиятни ташкил этишга оид минимал талабларнинг биттаси ёки бир нечтаси бажарилмагани –  15 кунга (агар 15 кунда бартараф этилмаса, бартараф этилгунига қадар).