Суриядаги жангарилар сафига қўшилмоқчи бўлган андижонлик фуқаро 8 йилга қамалди
Айбланувчи Туркияда қўлга олиниб, Ўзбекистонга олин келинганидан кейин ҳам террористик ташкилот аъзолари билан алоқада бўлган.
ДХХнинг хабар беришича, Андижон вилоятида яшовчи И. У. 2021-2022 йилларда Туркияда ишлаган даврида Суриядаги террористик ташкилот ёлловчиларининг таъсирига тушиб, уларнинг сафига бориб қўшилишни режа қилади. Натижада шу мақсадда у бир неча бор Сурияга ўтишга уринган, лекин туркиялик чегарачилар бунга имкон бермаган. Аммо, навбатдаги уриниш вақтида у ҳарбийлар томонидан қўлга олиниб, Ўзбекистонга депортация қилинган.
Қайд этилишича, мазкур шахс Андижонга қайтиб келганидан кейин ҳам ижтимоий тармоқлар орқали террористик ташкилот аъзолари билан алоқада бўлган.
ДХХ томонидан амалга оширилган тезкор тадбирлар натижасида И. У. нинг ноқонуний ҳаракатларига чек қўйилиб, айбланувчи 8 йил 1 ой муддатга озодликдан маҳрум этилди.
