Россия мудофаа харажатларини икки баравар оширди
Мудофаа харажатлари 2023 йилнинг дастлабки 6 ойида бюджетга сарфланган барча пулларнинг 37 фоизини ташкил қилган.
Россия ҳукумати 2023 йил учун тасдиқланган бутун ҳарбий бюджетни йил якунига етмасиданоқ сарфлади ва Украинани забт этиш учун ташланган армияга сарфлашни режалаштирган маблағни икки баравар оширишга мажбур. Бу ҳақда Reuters ҳукуматнинг ғазначилик харажатлари ижроси бўйича ёпиқ ҳужжатларига таяниб хабар бермоқда.
Агентликнинг таъкидлашича, дастлабки 6 ойда мудофаа харажатлари 5,59 триллион рублни ёки бюджетга сарфланган барча пулларнинг 37 фоизини ташкил қилган. Шу билан бирга, йил учун бюджет тўғрисидаги қонунга "миллий мудофаа" моддаси бўйича 4,91 триллион рубль киритилган — бу бир йил аввалгидан 1,5 баробар кўп.
Йиллик мудофаа харажатларининг янги режаси 9,7 триллион рубль ёки жорий курс бўйича 102 миллиард долларни ташкил этади, деб ёзади Reuters. Бу дастлаб режалаштирилганидан деярли икки баравар кўп ва барча бюджет харажатларининг учдан бир қисмини ташкил этади — 29,06 триллион рубль.
Умуман олганда, 2023 йилнинг биринчи ярмида бюджетдан 14,97 триллион рубль сарфланган — бир йил аввалгига нисбатан 2,44 триллион рубль кўп. Бундан ташқари, қўшимча харажатларнинг 97 фоизи қурол-яроғ, армия ва тегишли буюмлар ишлаб чиқаришга сарфланди.
Расмийлар январь-июнь ойларида фақат ҳарбийларнинг маошларига қарийб 1 триллион рубль сарфлаган, бу ўтган йилнинг шу даврига нисбатан 543 миллиардга кўп. Натижада, ҳарбий харажатларнинг бюджетдаги улуши мавжуд статистик маълумотларнинг бутун даври учун максимал даражага етди.
Нашр маълумотларига кўра, 2011 йилдан 2022 йилгача Россия мудофаага мамлакат бюджетининг 14 фоиздан 23 фоизгача маблағларини сарфлаган.
