Шойгунинг ташрифидан сўнг Ким Чен Ин қурол ишлаб чиқаришни кўпайтиришни буюрди
Бу мамлакат мудофаасини янгилаш жараёнида амалга оширилиши кўзда тутилган.
Шимолий Корея раҳбари Ким Чен Ин қурол-яроғ заводларига мамлакат мудофаасини янгилаш доирасида ишлаб чиқаришни кўпайтиришни буюрди. Бу ҳақда маҳаллий ОАВларга таяниб "Sky News" хабар бермоқда.
Бу мудофаа вазири Сергей Шойгунинг Шимолий Кореяга ташрифидан бир неча кун ўтиб содир бўлди. Маълумотларга кўра, ҳафта охирида Ким қанотли ракеталар, самолётлар ишлаб чиқарувчи корхоналарда текширув ўтказган.
Пхенян етакчиси жанговар шайликни ошириш бўйича муҳим масъулият ва вазифаларни қайд этиб, стратегик қуроллар учун ҳар хил турдаги илғор двигателларни оммавий ишлаб чиқаришга чақирди.
