АҚШ Давлат котиби Блинкен исёнчиларни Нигер президенти ва унинг оиласини озод қилишга чақирди
Энтони Блинкен Нигер президенти Муҳаммад Базум билан телефон орқали мулоқот қилди.
“Нигер президенти Базум билан ҳозирги конституциявий инқирозни тинч йўл билан ҳал қилиш бўйича давом этаётган саъй-ҳаракатларимиз ҳақида билдириш учун гаплашдим. Қўшма Штатлар уни ва оиласини зудлик билан озод қилишга чақириғимизни қўллаб-қувватлайди”, — деди сиёсатчи Х (собиқ Twitter) саҳифасида.
Аввалроқ, RFI радиостанциясига берган интервьюсида Блинкен АҚШ ҳарбийларининг Нигердан олиб чиқилиши мумкинлиги ҳақидаги саволга жавоб беришдан қочган эди. Миллий хавфсизлик кенгашининг стратегик алоқалар бўйича координатори Жон Кирбининг сўзларига кўра, Қўшма Штатлар Нигерда 1000 аскарга эга ва улардан хорижликларни эвакуация қилишда фойдаланишни режалаштирмаяпти.
Июль ойи охирида Нигер ҳарбийлари миллий телевидение орқали Базум ҳокимиятдан четлаштирилганини эълон қилди. Президент гвардияси қўмондони генерал Абдураҳмон Тчиани давлат телевидениесида тўнтариш иштирокчилари томонидан тузилган “Ватан мудофааси бўйича миллий кенгаш” раҳбари сифатида чиқди. Аксарият Ғарб давлатлари раҳбарлари ва ЭКОВАС минтақавий ташкилоти давлат тўнтаришини қоралади.
