Бошқа ҳайдовчининг жаримаси хонанда Жалолиддин Аҳмадалиевга ёзилгани аниқланди

 

Наманган шаҳрида бошқа бир ҳайдовчининг жаримаси хонанда Жалолиддин Аҳмадалиевга ёзилгани аниқланди. Вилоят ЙҲХБ ҳолат бўйича тушунтириш берди. 

 

Унга кўра, давлат рақам белгиси 50 М 434 КА бўлган Lacetti 4 август куни соат 14:09 да Наманган шаҳар 4Р-117 автомобиль йўлининг 15–34-километрлари, ҳаракат тезлиги 60 км/с чегараланган жойда 72 км/с тезлик билан ҳаракатланиб келган ва бу билан Маъмурий жавобгарлик тўғрисидаги кодекснинг 128,3-моддаси 1-қисмида назарда тутилган маъмурий ҳуқуқбузарликни содир этган.

 

Ҳолат юзасидан электрон тизим тақдим этган маълумот асосида фуқаро Аҳмадалиев Жалолиддин Комилжон ўғлига тегишли бўлган 40 Т 025 FB давлат рақам белгили Toyota’га нисбатан жарима солиш тўғрисидаги қарор шакллантирилган.

 

Юзага келган техник хатолик сабабли шакллантирилган қарор ишни кўриб чиққан ходим томонидан жойида бартараф этилиб, қарор Маъмурий жавобгарлик тўғрисидаги кодекснинг 271-моддаси 1-қисмига асосан бекор қилинган. Бироқ шаклланган қарор Ўзбекистон почтаси АЖ томонидан ушбу фуқаронинг яшаш манзилига юборилган.

 

Ҳозирда юзага келган ҳолат бартараф этилиб, ҳуқуқбузарлик содир этган 50 М 434 КА давлат рақам белгили Lacetti’нинг мулкдорига нисбатан жарима солиш тўғрисидаги қарор шакллантирилиб, тегишли таъсир чораси қўлланган.

 

Маълум қилинишича, Жалолиддин Аҳмадалиев Комилжон ўғлига тегишли бўлган 40 Т 025 FB давлат рақам белгили Toyota’нинг жами 9 та ҳолатда 8 миллион 250 минг сўм миқдордаги қарздорлиги мавжуд.