Ўзбекистонда ҳаво ҳарорати пасаяди
«Ўзгидромет» кутилаётган об-ҳаво маълумотларини эълон қилди.
«Ўзгидромет» маълумотларига кўра, бугун Ўзбекистон ҳудудига Урал ҳудудларидан кириб келган нисбатан салқин ҳаво тарқала бошлайди ва ҳарорат фони республика бўйича аста-секин пасаяди.
Қайд этилишича, дам олиш кунлари ҳароратнинг аста-секин пасайиши давом этади. Якшанба куни кундузги ҳарорат 30-32 даражадан, жанубда 35 даражадан ошмайди.
Дам олиш кунларида республиканинг катта қисмида қуруқ ва кам булутли об-ҳаво сақланиб туради, фақат Тошкент вилояти ва Фарғона водийси вилоятларининг тоғ олди ва тоғли ҳудудларида қисқа муддатли ёмғир ёғиши, момақалдироқ бўлиши мумкин.
Кейинги ҳафтанинг ўртасида кундузги ҳаво ҳарорати 27-30 даражагача янада пасаяди. Айниқса кечаси ва эрталаб ҳавонинг салқинлашиши сезиларли бўлади, бунда ҳарорат 13-16 даражагача пасаяди, дейилади гидрометеорология маркази хабарида.
