«Ўзгидромет» ҳафта давомида кузатиладиган об-ҳаво маълумотини эълон қилди
Ушбу ҳафта давомида ҳарорат фони меъёрдан паст бўлади. Натижада ҳафта охирига келиб, ҳарорат кечалари 17-20 даража атрофида бўлади.
«Ўзгидромет» маълумотларига кўра, бугун ва эртага республика ҳудуди бўйича салқин об-ҳаво сақланиб туради, ҳарорат кечалари 13-16 даража, кундуз кунлари 27-32 даража, жанубда эса 35 даражагача бўлади. Қайд этилишича, бу август ойи ўртаси учун меъёрий қийматлардан 2-4 даражага пастдир.
Бироқ ҳафта ўртасига бориб салқин ҳаво массаси республика ҳудудидан аста-секин чекина бошлайди ҳамда ҳарорат кўтарилади. Натижада ҳафта охирига келиб, кечалари 17-20 даража, кундуз кунлари 34-37 даража атрофида бўлади.
«Ушбу кунларда ҳудуднинг катта қисмида қуруқ ва кам булутли об-ҳаво сақланиб туради, фақат Фарғона вилоятининг айрим тоғли ҳудудларида бугун кечга томон қисқа муддатли ёмғир ёғиши, момақалдироқ бўлиши мумкин», — дейилади хабарда.
Шунингдек, 14-15 август кунлари республика бўйича баъзи жойларда шамол тезлиги 15-20 метр/секундгача кучаяди, айрим жойларда чанг-тўзон билан кузатилиши мумкин.
