Беларус "Вагнер" аскарларига янги исм-шарифлар билан паспорт бермоқда

Бу ҳақда Беларус мухолифати етакчиси Павел Латушко маълум қилди.

Унинг айтишича, бу амалиёт бир ойдан бери давом этмоқда ва бу қўпорувчилик ҳамда терактлар тайёрлаш билан боғлиқ бўлиши мумкин.

Латушконинг сўзларига кўра, у ҳозиргача нечта ёлланма аскарга Беларус паспорти берилгани ҳақида маълумотга эга эмас. Латушконинг қўшимча қилишича, янги паспортга эга бўлган "Вагнер" аскарлари чегара орқали Европа Иттифоқи ҳудудига ҳам ўтишлари мумкин.

Латушконинг таъкидлашича, ҳозирда Беларусда бир неча минг "Вагнер" хусусий ҳарбий ширкати жангарилари мавжуд. Мамлакат президенти Александр Лукашенко эса уларнинг сонини янада ошириш учун етарли молиявий ресурсларга эга эмас. "Шу боис, уларнинг бир қисми Африкага кетади, иккинчиси Россия Мудофаа вазирлиги билан шартнома тузади, қолганлари эса ё кетишади ёки Беларусда қолади", — дейди у.