Россиядаги дронлар ҳужумини Украина уюштирганми?
Жорий йилда мамлакатда 190 дан ортиқ гумон қилинган ҳужумлар содир этилган.
Россия мамлакатда кузатилган дрон ҳужумлари ортида Украина турганини бир неча бор даъво қилди. Киев эса булар учун жавобгарликни ўз зиммасига олмади. Президент Владимир Зеленский аввалроқ Россия ҳудудига ҳужумлар “муқаррар, табиий ва мутлақо адолатли жараён” эканини айтганди.
Россияда дрон ҳужумлари қачондан бошланди?
ББС Верифй 2023 йил бошидан бери Россия оммавий ахборот воситаларида дрон ҳужумлари ҳақидаги хабарларни кузатиб боради. Уларга кўра, жорий йилда Россия ва ушбу мамлакат томонидан аннекция қилинган Қримда 190 дан ортиқ гумон қилинган ҳужумлар содир этилган. Уларнинг энг сўнггиси 30 август куни тунда содир этилган бўлиб, ҳужумлар йил бошидан бери бир кун ичида кузатган энг кенг кўламлисидир, дронлар Россиянинг жануби-ғарбий қисмидаги камида олтита минтақага зарба берди.
23 август куни Белгородда учувчисиз самолёт ҳужуми оқибатида уч киши ҳалок бўлди, бир неча кун аввал эса дронларнинг Курск вилоятида темирйўл вокзалига урилиши оқибатида беш киши яраланди.
Санкт-Петербург жанубидаги авиабазада Россиянинг энг йирик Туполев Ту-22 бомбардимончи самолётларидан бири гумон қилинган учувчисиз учоқ ҳужуми натижасида ёниб кетди.
Шунингдек, 2023 йилда Қора денгиздаги Россия нишонларига, жумладан, денгиз базалари ва Қрим кўпригига ўнга яқин денгиз дронлари ҳужуми уюштирилди.
Август ойида Украинага тегишли деб гумон қилинган учувчисиз самолёт Москвадаги кўргазма марказига урилиб, бино залига зарар етказди.
4 июль куни учувчисиз самолёт ҳужумидан сўнг Москвадаги Внуково халқаро аэропортидан парвозлар бошқа жойга йўналтирилди ва аэропорт қисқа муддатга ёпилди.
Ижтимоий тармоқларнинг хабар беришича, сўнгги пайтларда Москвага қилинган бир неча ҳужумларда «Қундуз» типидаги учувчисиз учиш аппаратлари – яқинда Украина томонидан ишлаб чиқарилган узоқ масофали ҳужумчи самолётлар иштирок этган.
Февраль ойида учувчисиз самолёт Москвадан 100 км узоқликда қулаган, маҳаллий губернаторнинг айтишича, бу фуқаролик инфратузилмасини нишонга олишга уриниш эди. Вайроналарнинг сурати УЖ-22 - Украина томонидан ишлаб чиқарилган дрон турига мос келадиган кўринади. У автоном парвозда 800 км масофага эга. Тўғридан-тўғри бошқариладиган парвозда унинг масофаси анча қисқа.
29 апрель куни Қримнинг йирик шаҳри Севастополда бир нечта нефть танклари зарбага учраган ва вайрон қилинган. Нефть омборининг иккита сунъий йўлдош тасвири ёрдамида ааниқланишича дронлар Украинага тегишли.
Sibylline хавфсизлик бўйича консалтинг компанияси таҳлилчиси Лайла Гуэст шундай дейди: “Украина кучлари катта эҳтимол билан нефтни қайта ишлаш заводларини, шунингдек, темирйўл инфратузилмаси ва Россиянинг кенгроқ логистикасини максимал даражада бузилишларга олиб келишини мақсад қилишади”.
Украина дронлар ишлаб чиқаришни жадал суръатлар билан ошираётганини айтмоқда, чунки олдинги қаторда талаб ортиб боряпти. Мутахассислар Украинадан учирилган дронлар Россия ҳудудига чуқур кириб бориши мумкинлигини айтишмоқда. Украина эса буни тасдиқламаган.
