Гуржистон президенти истеъфога чиқмаслигини маълум қилди
Мамлакат ҳукмрон партияси 1 сентябрда Президентга нисбатан импичмент жараёнини бошлаганини эълон қилганди.
Гуржистон президенти Саломе Зурабишвили ҳукмрон партиянинг унга нисбатан импичмент эълон қилишга уринишлари фонида истеъфога чиқмоқчи эмаслигини айтди.
Бу ҳақда у Гуржистон жамоат телерадиокомпаниясининг Биринчи канали орқали эфирга узатилган телемурожаатида айтди.
«Мен ҳеч қаерга кетмайман... Ҳамма менинг истеъфога чиқишим бўйича умидларни унутиши керак», — дея таъкидлади Зурабишвили.
Зурабишвили фақат Гуржистон халқи олдида жавоб бериши ва сафарларни шахсий маблағи ҳисобига амалга ошираётганини таъкидлади.
«Мен фақат сизнинг олдингизда жавоб бераман, чунки сиз мени танладингиз ва бу танлов учун мен катта масъулиятни ҳис қиляпман. Сиз мени танладингиз, мен бутун умрим давомида Европа тарафдори бўлиб келганман, Гуржистоннинг Европа келажагини қўллаб-қувватлаганман», — дея қўшимча қилди у.
Эслатиб ўтамиз, мамлакат ҳукмрон партияси — «Гуржистон орзуси» 1 сентябрда Президентга нисбатан импичмент жараёнини бошлаганини эълон қилганди.
