Россиялик дастурчи va хакерлар туфайли Туркияда кибержиноятлар сони ошди
Мигрант хакерлар дастлаб маҳаллий хакерлар билан ҳамкорликда кичик онлайн фирибгарликлар билан шуғулланган. Сўнг ўғирланган маълумотларни Европа бозорида сотишган ва улардан тушган даромадларни қонунийлаштиришган.
Financial Times нашрининг маълум қилишича, Россия Федерациясида ҳарбий хизматга қисман сафарбарлик бошланганидан кейин келган россиялик дастурчи va хакерлар туфайли Туркияда кибержиноятлар сони ошди.
Нашрнинг манбаларга таяниб ёзишича, россиялик мигрант хакерлар дастлаб маҳаллий хакерлар билан ҳамкорликда кичик онлайн фирибгарликлар билан шуғулланган, ўғирланган маълумотларни Европа бозорида сотишган ва улардан тушган даромадларни қонунийлаштиришган.
Яқинда Туркия полицияси тергов бошлашга қарор қилди, чунки россиялик ва маҳаллий хакерлар бир-бирининг кучли томонларидан фойдаланиб иш тутадиган кибержиноий гуруҳлар туза бошлаган.
Исми сир қолишини истаган киберхавфсизлик бўйича мутахассиснинг нашрга айтишича, россиялик хакерлар туркиялик ҳамкасбларини катта ҳажмдаги маълумотлар билан ишлашга ўргатган ва Ғарбий Европадаги алоқалари орқали фойдали битимлар тузишга бошчилик қилишган.
Манбанинг таъкидлашича, хакерлар ўғирланган криптовалютани турк лирасига айлантириш, Туркия фуқаролигини олиш учун кўчмас мулк сотиб олиш йўллари ва бошқа масалалардаги кибержиноятларни ҳам амалга ошира олади.
