Икки кун ичида Италиянинг Лампедуза оролига 7 минг мигрант келди

 

Ўртаер денгизидаги Италия оролига Африка ва Яқин Шарқдан келган муҳожирларнинг келиши тўхтамаяпти ва улар у ердан Италиянинг бошқа ҳудудларига олиб кетилмоқда. Бу ҳақда Euronews хабар берди.

 

Шу ҳафтанинг икки кунида Италиянинг Лампедуза оролига Африка ва Яқин Шарқдан 7 минг муҳожир етиб келди.

 

Чоршанба куни оролдаги 6 мингдан ортиқ одамнинг учдан бир қисми Италиянинг бошқа қисмларига етказилган. Портда юзлаб муҳожирлар ўз навбатини кутмоқда.

 

Лампедузадаги 400 кишилик қочқинларни қабул қилиш маркази барча келганларни қабул қила олмайди.

 

Муҳожирларнинг бир қисми порт яқинида қолишади. Баъзида у ерда вазият кескинлашади ва Италия полицияси муаммони ҳал қилишга мажбур бўлади.

 

Об-ҳаво денгиз бўйлаб сузиб ўтиш учун қулай, аммо бу ҳафта яна бир кема ҳалокатга учради. Тунисдан келган муҳожирларнинг чорак қисми ҳалок бўлди, ноқонуний йўллар билан Италия қирғоқларига етиб олишга уринган 20 киши қутқарилди.