“Керак бўлса, Евроиттифоқ билан алоқаларни узамиз”
Эрдўған Европарламентнинг Туркия ҳақидаги ҳисоботига изоҳ берди.
Туркия керак бўлса, Европа Иттифоқи билан алоқаларни узиши мумкин. Бу ҳақда мамлакат президенти Ражаб Тоййиб Эрдўған маълум қилди.
Европарламент томонидан шу ҳафта қабул қилинган ҳужжатда айтилишича, Туркиянинг Европа Иттифоқига кириш жараёни ҳозирги шароитда қайта тиклана олмайди, шунинг учун Европа Анқара билан алоқалари учун “параллел ва реал асос”ни ўрганиши керак.
“Европа Иттифоқи Туркиядан алоҳидаланишга ҳаракат қилмоқда. Биз бу воқеаларни баҳолаймиз ва керак бўлса, биз Европа Иттифоқи билан алоқаларни узишга эришамиз”, — деб таъкидлади Эрдўған ўз баёнотида.
Шу ҳафта бошида Туркия Ташқи ишлар вазирлиги Европарламент ҳисоботида “асоссиз айбловлар ва нотўғри қарашлар борлиги ҳамда юзаки ва узоқни кўрмайдиган ёндашув кўрсатилганлиги” ҳақида баёнот берганди.
Туркия 24 йилдан бери Европа Иттифоқига аъзоликка номзод мақомида қолмоқда, аъзолик бўйича музокаралар сўнгги йилларда ЕИ ва Анқара ўртасида инсон ҳуқуқлари ва қонун устуворлиги борасидаги муаммолар туфайли тўхтаб қолган.
