Хитой Осиё ўйинларида атлетларни синовдан ўтказмоқда
Бугун мусобақанинг учинчи кунги баҳслари бўлиб ўтмоқда.
Бир неча кун олдин тўрт йилликнинг яна бир нуфузли мусобақаларидан бири Осиё ўйинларига старт берилди. Мезбон Хитойнинг Ханчжоу шаҳри. Қитъанинг 45 давлатидан келган 12 минг 417 нафар спортчи 40 га яқин спорт тури бўйича беллашувларни бошлаб юборишди. Ўзбекистон спорт делегациясидан жой олган 370 нафардан ортиқ спортчи 38 спорт тури бўйича қитъа ўйинларида совринли ўринлар учун курашга киришган.
Жараёнлар ҳақида қисқача
Ҳар куни шода-шода медаллар ўз эгаларини топмоқда. Айни вақтда қадар умумжамоа ҳисобида мезбонлар яққол пешқадам. Иккинчи ва учинчи ўринларни Корея Республикаси ва Япония жамоалари банд этган. Ўзбекистонлик спортчилар эса умумий ҳисобда 21 та медални қўлга киритишган, шу сабабли жамоа тўртинчи ўринда бормоқда.
Самимий ташуккур изҳор этилди
Хитойда бўлиб ўтаётган ХИХ Осиё ўйинларини Ёшлар сиёсати ва спорт вазири Адҳам Икромов, Ўзбекистон Олимпия қўмитаси бош котиби Ойбек Қосимов бундан ташқари спорт федерацияларининг президентлари бевосита беллашувлар бўлиб ўтаётган жойнинг ўзидан кузатиб бормоқда. Бу эса спортчиларимизга янада куч бағишлаши турган гап. Шунингдек, мусобақанинг очилиш маросимида иштирок этган Осиё Олимпия Кенгаши вице президенти Отабек Умаров Хитой Халқ Республикаси Раиси Си Цзиньпин билан учрашиб, унга Осиё Олимпия Кенгаши фаолиятига бўлган эътибори учун ўз ташаккурини изҳор этди.
Тарихга назар
Осиё ўйинлари 4 йилда 1 марта ўтказиладиган нуфузли спорт тадбири ҳисобланади. Турнирга Осиё Олимпиада кенгаши томонидан 1949 йил 13 февралда асос солинган ва мусобақани ўтказувчи Осиё ўйинлари федерациясини ташкил этган. Унинг низоми Олимпия ўйинлари ғоялари асосида тузилган. Ҳар бир давлат Осиё ўйинларининг қайси турларида иштирок этишини ўзи белгилайди, лекин иштирокчилар сони ташкилий қўмита ва Осиё Олимпиада кенгаши белгилаган миқдордан ошиб кетмаслиги керак. Ўзбекистон спортчилари Осиё ўйинларида 1994 йилдан қатнашишни бошлаган.
Энг яхши натижа 5-ўрин
Бундан тўрт йил олдин Индонезиянинг Жакарта шаҳрида бўлиб ўтган охирги Осиё ўйинларида Ўзбекистон делегацияси 21 та олтин, 24 та кумуш ва 25 та бронза, жами 70 та медални қўлга киритганди. Мазкур турнирда вакилларимиз 45 давлат ораси умумжамоа ҳисобида бешинчи ўриндан жой олганди. Умуман олганда ўзбекистонлик спортчиларнинг Осиё ўйинларидаги иштироки доим омадли кечган. Мусобақада етти бор қатнашган спортчиларимиз турли йилларда ҳар хил ўринларни банд этган. Бироқ, шу кунга қадар жамоавий ҳисобдаги энг яхши натижа бешинчи ўрин бўлиб қолмоқда. Делегациямиз вакиллари Жакарта, Пусан ва Хиросима шаҳарларида ўтказилган Осиё ўйинларида ана шундай натижага эришишган. Спортчиларимиз Банкокда 10-ўрин, Доҳада 7-ўрин, Гуангжоуда 8-ўрин ва Инчеонда ўтган Осиё ўйинларида умумжамоа ҳисобида 11-ўриндан жой олишган.
Бу ҳали ҳаммаси эмас
Бугун Хитой мезбонлик қилаётган навбатдаги Осиё ўйинларининг учинчи кунги баҳслари ўз якунига етди. Айни вақтда қадар делегациямиз вакиллари дзюдо, академик эшкак эшиш, қиличбозлик каби турларидан медалларни жамғаришга муваффақ бўлишди. Ҳали спортчиларимиз яққол фаворит бўлган миллий кураш ва бокс спорт турлари бўйича асосий беллашувлар олдинда. Шунингдек, мусобақа ғолиблиги учун асосий даъвогар ҳисобланган Ўзбекистон футбол терма жамоаси ҳам ўз юришини давом эттирмоқда. Маълумот учун, ўзбек кураши Осиё ўйинлари дастурига 2006 йил Қадар пойтахти Доҳа шаҳрида бўлиб ўтган Осиё ўйинларида киритилган эди. Жакартада ўтган охирги ўйинларда вакилларимиз миллий кураш бўйича 6 та олтин, 2 та кумуш ва 4 та бронза медали соҳибига айланишган. Бокс спорт турида эса 5 та олтин ва 2 та кумуш медаль қўлга киритилган.
