2024 йил 1 январдан тан олинмаган Тоғли Қорабоғ ўз фаолиятини тўхтатади

 

Тан олинмаган Тоғли Қорабоғ республикаси (ТҚР) тугатиш ҳақида қарор қабул қилинди.

 

Қарорни тан олинмаган республика раҳбари Самвел Шахраманян имзолади. Унга кўра, ТҚР 2024 йил 1 январдан тугатилади. 

 

Барча давлат идоралари тарқатиб юборилади, Қорабоғ ҳудуди тўлиқ Озарбайжон назоратига қайтди.

 

Маълумот ўрнида, 19 сентябрь куни Озарбайжон Қорабоғда «конституцион режимни тиклаш» мақсадида «маҳаллий характердаги аксилтеррор тадбирлар» бошланганини эълон қилганди. 2020 йилдаги урушдан кейин ҳудудга жойлаштирилган россиялик тинчликпарвар кучлар бунга тўсқинлик қила олмади.

 

Икки кунлик ҳарбий ҳаракатлардан кейин Тоғли Қорабоғ ҳукумати армиясини тўлиқ қуролсизлантириш ва арман ҳарбий техникалари ҳудуддан олиб кетилишига рози бўлиб, ўт очишни тўхтатиш бўйича келишувга эришди. Ҳарбий ҳаракатлар оқибатида Тоғли Қорабоғдаги арман ҳарбийларининг мингдан ортиғи, Озарбайжон қуролли кучларидан эса 200 га яқин киши ҳалок бўлган.Озарбайжон ҳукумати Қорабоғда қоладиган арманларга ҳеч қандай таҳдид йўқлигини кафолатламоқда. Лекин Қорабоғдаги ва Арманистондаги арманлар бунга ишонишмаяпти.

 

Еревандагиларнинг маълум қилишича, ўтган вақт ичида Тоғли Қорабоғда яшаб келган 120 мингга яқин этник арманлардан камида 47,1 минг киши аллақачон Арманистон ҳудудига ўтгани ҳақида маълум қилган. Одамлар ва уларнинг уй-рўзғор буюмлари билан тўлиб-тошган юзлаб автомобиллар, юк машиналари ҳамда автобуслар Озарбайжондан олиб келувчи тоғли йўллар орқали Арманистон томон ҳаракатланишда давом этмоқда.

 

24 сентябрдан бошлаб Тоғли Қорабоғ аҳолиси ҳудудни тарк эта бошлади. Арманистон ҳукумати пайшанба куни “65 минг 36 нафар мажбуран кўчирилганлар Арманистон ҳудудига кирганини” маълум қилди. Расмий маълумотларга кўра, Тоғли Қорабоғда 120 мингга яқин арман истиқомат қилган.