Арманистон Озарбайжонни судга берди
Расмий Ереван Гаагадаги Халқаро судга мурожаат қилган.
Арманистон Озарбайжонга нисбатан вақтинчалик чора қўллаш талаби билан Гаагадаги Халқаро судга мурожаат қилди.
“Арманистон Республикаси Низомнинг 41-моддаси ва Суд Регламентининг 73-моддасига асосланиб, 28 сентябрь куни судга Халқаро конвенцияда мустаҳкамланган ҳуқуқларни сақлаш ва ҳимоя қилиш бўйича вақтинчалик чоралар кўриш тўғрисида илтимоснома юборди” - дейилади баёнотда.
Арманистон БМТ судини Озарбайжоннинг “Тоғли Қорабоғдан қолган этник арманларни кўчиришга қаратилган тўғридан-тўғри ёки билвосита ҳар қандай ҳаракатларни амалга оширишдан” воз кечиш мажбуриятини тасдиқлашга чақирди.
Эслатиб ўтамиз, 19 сентябрь куни Озарбайжон Қорабоғда “конституциявий тузумни тиклаш” учун “антитеррор тадбирлари” ўтказилишини эълон қилган эди. Шу куни Боку операцияни тугатиш шартларини, жумладан, минтақадаги кучларни таслим қилиш ва қуролсизлантиришни эълон қилди. 20 сентябрь куни Тоғли Қорабоғ ҳокимияти ўт очишни тўхтатиш таклифини қабул қилди.
