Венецияда сайёҳларни олиб кетаётган автобус ёниб кетди
Автобус темирйўл рельслари ёнидаги йўл ўтказгичдан қулаб тушган. ЙТҲда 20 дан ортиқ одам ҳалок бўлган, улар орасида болалар ҳам бор.
Венецияда, Местре ва Маргер туманларини боғловчи темирйўл релслари яқинида сайёҳларни олиб кетаётган автобус йўл ўтказгичдан қулаб тушди ва ёниб кетди. Италиянинг Corriere della Sera газетасининг хабар беришича, ушбу йўл-транспорт ҳодисасида камида 21 киши, жумладан, уч нафар бола ҳалок бўлган. 15 киши жабрланган, улардан тўрт нафари болалар, беш нафар ярадорнинг аҳволи жуда оғир.
Нашрнинг ёзишича, автобусда бошқа йўловчилардан ташқари бир гуруҳ украиналиклар ва бир неча Германия фуқаролари кетаётган бўлган. Қурбонлар орасида беш нафар Украина фуқароси, бир немис, бир хорват, бир француз ва италиялик ҳайдовчи бор.
Фожиа содир бўлган жойга шахсан ташриф буюрган Венеция мэри Луижи Бруняро воқеа содир бўлган жойдан, ён томонида ётган автобусдан қора тутун булутлари кўтарилаётгани акс этган кадрларни «қиёмат манзараси» деб атади. ЙТҲ қурбонлари хотирасига Венецияда мотам эълон қилинди.
Италия ҳукумати қурбонларнинг оилаларига ҳамдардлик билдирди . Хусусан, Венеция мэри Луижи Бруньярога Италия президенти Сержио Маттарелла ва мамлакат бош вазири Жоржа Мелони қўнғироқ қилган.
"Мен ва бутун ҳукумат Местредаги жиддий йўл-транспорт ҳодисаси учун чуқур ҳамдардлик билдирамиз. Бизнинг фикримиз қурбонлар, уларнинг оила аъзолари ва яқинлари билан", — деган Мелони.
