Трамп АҚШда янги лавозимни эгаллаши мумкин
Таклифни бир қатор конгрессменлар юборган.
АҚШнинг собиқ президенти Доналд Трамп агар Республикачилар партияси бошқа номзод бўйича келиша олмаса, Вакиллар палатаси спикери лавозимини вақтинча эгаллашга тайёрлигини айтди.
"Мен буни хоҳлаганим учун қилмаяпман. Улар мендан партия манфаати учун қисқа муддатга, келишувга келгунларича лавозимни қабул қилишга рози бўласизми деб сўрашди", деди Трамп.
Собиқ президентнинг сўзларига кўра, у мамлакат ҳокимият иерархиясидаги учинчи лавозимни 30, 60 ёки 90 кунлик муддатга - партиядошлар узоқроқ муддатга келишиб олмагунча қабул қилишга рози.
Сиёсатчининг аниқлик киритишича, бу сўров унинг Конгрессдаги кўплаб «дўстлари»дан келган.
Спикер стулини ҳеч қачон Вакиллар палатасидан ташқаридаги шахс эгалламаган, аммо қонун бу вариантни тақиқламайди. Бир қанча конгрессменлар Кевин Маккарти лавозимидан четлатилганидан кейин бўшатилган лавозимда Трампни кўришни исташларини аллақачон айтишган.
Спикерлик учун сайлов келаси ҳафтага белгиланган ва ундан бир кун олдин республикачилар номзодларни муҳокама қилиш учун йиғилиш ўтказади.
