Ёпиқ эшиклар ортида ҲАМАСнинг ҳаракатлари ҳақида нималар дейилди?
БМТнинг Хавфсизлик кенгаши навбатдан ташқари йиғилиш ўтказди.
Бирлашган Миллатлар Ташкилоти Хавфсизлик кенгаши навбатдан ташқари йиғилишда ҲАМАС ҳаракатини бир овоздан қоралаб чиқмади. 8 октябрь куни ёпиқ эшиклар ортида ўтган йиғилишда Хавфсизлик кенгаши аъзолари ягона қарор бўйича келиша олмади.
«Брифингда аслида нималар муҳокама қилингани ҳақида батафсил маълумот бермоқчи эмасман, бироқ ҲАМАС ҳужумларини қоралаган бир қатор давлатлар бор», — дея АҚШнинг БМТдаги доимий вакили ўринбосари Роберт Вуддан иқтибос келтирган CNN.
Вуднинг қўшимча қилишича, айрим давлатлар ҲАМАСни қоралашга ҳам тайёр эмас.
Америкалик дипломатга кўра, Қўшма Штатлар БМТ олий органи йиғилишидан олдин ҳам ҲАМАС бир овоздан қораланишини кутаётганини очиқ айтган.
«Жаҳон ҳамжамиятининг содир бўлган ва содир бўлаётган ҳужумлар ва ҳаракатларни кескин қоралаши муҳим», — деди Роберт Вуд.
