Франциядаги мактабда қуролли ҳужум содир этилди
Ҳужумчи 20 ёшли чеченистонлик йигит.
Франциянинг Аррас шаҳридаги Гамбетта мактабига пичоқ билан қуролланган номаълум шахс бостириб кирди ва ўқитувчига ҳужум қилди. Оқибатда ўқитувчи ҳалок бўлди, яна бир неча киши жароҳат олган.
Франция ички ишлар вазири Гералд Дарманиннинг айтишича, полиция ҳужумчини зарарсизлантириш учун операция ўтказган. Ҳужум қилган шахс қўлга олинган. Франция ОАВларининг ёзишича, у 20 ёшли чеченистонлик бўлиб чиқди.
Ҳужум сабаблари ва бошқа тафсилотлар ўрганилмоқда. Елисей саройининг билдиришича, президент Эммануэл Макрон ва мамлакат таълим вазири тез орада пичоқбозлик содир бўлган жойга боради.
