Титан сувости кемаси ҳақида янги тафсилотлар эълон қилинди
Атлантика океани тубида ҳалокатга учраган кема ва инсон қолдиқлари топилди.
Муҳандислар Титаник кемасини кўриш учун йўл олган ва бахтсиз саёҳат чоғида портлаб кетган Титан сувости кемаси қолдиқларини топишди. Бу ҳақда АҚШ Соҳил хавфсизлик хизмати хабар берди
Кема июнь ойида шўнғиш пайтида ҳалокатга учраган. Унинг бортидаги барча беш йўловчи қурбон бўлган.
Сувости кемасини қидириш халқаро миқёсда олиб борилган. Жараён бир неча кун давом этган ва жамоатчилик эътиборини тортганди.
Соҳил хавфсизлик хизмати ходимлари кеманинг қўшимча қисмлари ўтган ҳафта океан тубидан топилиб, АҚШ портига олиб кетилганини айтди. Тиббиёт ходимлари инсон қолдиқларини таҳлил қилмоқда.
Титан сувости кемаси уни қурган OceanGate компанияси томонидан экспериментал деб таърифланган бўлсада, қурилма Шимолий Атлантика океанида денгиз сатҳидан 3800 метр пастда жойлашган Титаник ҳалокатига бир неча бор шўнғишни амалга оширган.
Сувнинг кучли босими остида портлаб кетган кема бортида компания бош директори Стоктон Раш ҳам бор эди.
Ҳалок бўлган қолган тўрт йўловчи: 48 ёшли покистонлик тадбиркор Шаҳзода Довуд, унинг 19 ёшли ўғли Сулаймон, 58 ёшли британиялик тадбиркор Ҳамиш Хардинг ва 77 ёшли собиқ француз денгиз флоти ғаввоси Пол-Генри Наргеолет.
Титан кемасининг корпуси углерод толасидан ясалган бўлиб, унинг учида титаниум плиталари ва бир учида кичик ойна мавжуд. Углерод толаси титан ёки пўлатдан арзонроқ ва ўта мустаҳкам, аммо у инсонлар билан чуқур денгизга шўнғиш учун асосий синовдан ўтмаган эди.
Табиий офат бўйича халқаро тергов давом этмоқда ва Соҳил Хавфсизлик хизмати келгусида жамоатчилик муҳокамаси ўтказилишини айтди.
