"Жадидларнинг эзгу қарашлари бизга умид ва илҳом беради"

 

“Жадидлар: миллий ўзлик, истиқлол ва давлатчилик ғоялари” мавзусидаги халқаро илмий конференциясида иштирок этаётган Туркистон ва Озарбайжонни ўрганиш маркази раҳбари Меҳмет Тутунчу туркий халқларнинг илк ўрта асрлардан то бугунги кунгача бўлган тарихий йўлини харитага жойлаштирганликларни айтиб ўтди.

 

"Тошкентда ташкил этилган ушбу конференцияни жуда муҳим деб ҳисоблайман ва унинг аҳамиятини юқори баҳолайман. Чунки Ўзбекистон 100 йилдан сўнг илк бор жадидларни бу қадар яқиндан таниш, уларнинг фаолиятига бу қадар чуқур назар солиш имконига эга бўлди. Анжуманнинг асосий аҳамияти – бугунги Марказий Осиё давлатлари мустақиллиги ғоясини юз йил аввал илгари сурган жадидларнинг такроран тарих саҳнасига чиқишига имкон яратилди. Улар шу ғоя учун оғир замонда оғир курашларни бошдан кечирдилар, лекин ўзлари орзулари рўёбини кўра олмадилар. Бугун биз бу анжуманда бир миллат, бир давлат сифатида жадид боболаримизнинг ватанпарварлик, инсонпарварлик ғоялари қайта жонланганига гувоҳ бўлиб турибмиз. Бу туйғу бизга янги марраларни забт этишимизда йўл кўрсатишига ишонамиз. Туркий халқларнинг илк ўрта асрлардан то бугунги кунимизгача бўлган тарихий йўлини харитага жойлаштирдик. У ерда жадидлар фаолияти ҳам яққол акс этган. Бундай нуфузли конференцияда қатнашаётганимдан ва ушбу харитани иштирокчиларга тақдимот қилганимдан хурсандман. Ўзбекистон Президентнинг табрикларини эшитиб, мамнун бўлдим. Биз – неча йиллардан буён Туркия ва Европада яшаб келаётган турклар доим туркий халқларнинг ҳур, мустақил бўлишини орзу қилиб яшадик. Мана, бугун айни шу ерда биз бир пайтлар тақиқ ва таъқиб қилинган фикрлар, шахслар яна ёруғликка чиққанини, қадр топаётганини кўриб турибмиз. Жадидларнинг эзгу қарашлари бизга умид ва илҳом беради, улар ўлган бўлса ҳам, уларнинг ғоялари ўлмайди, бизнинг мақсадимиз шу ғояларга ҳаёт бахш этиш – Ўзбекистон Президенти ҳам ўз табригида шу жиҳатларга эътибор қаратгани қувонарли".