Трампнинг Нью-Йоркдаги осмонўпар бинолари мусодара қилиниши мумкин
АҚШ собиқ президенти 355 миллион доллар жаримага тортилган.
АҚШнинг собиқ президенти Доналд Трамп 355 миллион доллар жарима тўламаса, унинг активлари, жумладан осмонўпар бинолари мусодара қилиниши мумкин. Бу ҳақда Нью-Йорк бош прокурори Летитиа Жеймс маълум қилди.
“Агар унинг жаримани тўлаш учун маблағи бўлмаса, биз қонуний механизмларни ишга туширамиз ва судьядан унинг активларини мусодара қилишни сўраймиз”, — деган бош прокурор.
16 февраль куни Нью-Йорк суди Трампни фуқаролик фирибгарлиги бўйича айбдор деб топди. Ҳокимият сиёсатчи ва унинг кўчмас мулк компаниясига 355 миллион доллар жарима тўлашни маълум қилган. Бундан ташқари, Трампга Нью-Йоркда рўйхатдан ўтган ҳар қандай корпорацияда директор ёки бошқа раҳбарлик лавозимини эгаллаши уч йилга тақиқланган.
