Гитанас Науседа Литва президенти этиб қайта сайланди
Унинг рақиби, бош вазир Шимоните мағлубиятини тан олди.
Литвадаги президентлик сайловларида иккинчи турда мамлакатнинг амалдаги президенти, 60 ёшли Гитанас Науседа ғалаба қозонди. Дастлабки натижаларга кўра, у 75 фоизга яқин овоз тўпламоқда.
Науседанинг иккинчи турдаги рақиби, 49 ёшли бош вазир Ингрида Шимоните аллақачон мағлубиятини тан олган.
"Мен Литванинг сайланган президентини табриклайман", — дея унинг сўзларини келтиради AFP.
Икки ҳафта олдинги сайловларнинг биринчи босқичида Науседа 44 фоиз, Шимоните 20 фоиз овоз олган.
Гитанас Науседа расман партиясиз, бироқ социал-демократлар томонидан қўллаб-қувватланади. У 2019 йилдан бери президент бўлиб, Украинага Россия агрессиясига қарши курашда ёрдам беришнинг кучли тарафдори сифатида танилган. Ингрид Шимоните Литва бош вазири бўлиб, ҳукмрон ўнг марказчилар коалицияси томонидан қўллаб-қувватланади.
