Францияда теракт тайёрлашда гумонланган шахс ҳибсга олинди
Портлаш натижасида гумонланувчи куйиш жароҳати олган ва унга тиббий ёрдам кўрсатилган.
Франция терроризмга қарши прокуратураси (PNAT) Шарл де Голл халқаро аэропорти яқинидаги Руасси-Ан-Франс шаҳрида жойлашган меҳмонхонада портловчи моддани ишга туширган Россия ва Украина фуқаролигига эга эркакни ҳибсга олди. Бу ҳақда Le Figaro манбасига таяниб хабар бермоқда.
Дастлабки маълумотларга кўра, гумонланувчи Украина армияси учун мўлжалланган Франция ҳарбий техникасини йўқ қилиш учун бир нечта портловчи мосламалар ясамоқчи бўлган.
Полиция тинтув чоғида унинг хонасидан портловчи мосламалар ва ўқотар қуроллар ясашга мўлжалланган материалларни топди. BFMTV телеканалига кўра, у ерда бир нечта паспорт ҳам топилган.
Le Figaro нашрига кўра, гумонланувчи Донбассда туғилган, у Россия армияси сафида икки йил жанг қилган.
